Bleika vikan í ELKO 2023

Bleik vika í ELKO skilar 1,2 milljónum til krabbameinsfélagsins

ELKO styrkir Krabbameinsfélagið um 1,2 milljónir króna í kjölfar áheita tengdum „bleikri viku“ dagana 16. til 22. október. Mikill vöxtur er í söfnuninni milli ára, eða ríflega tvöföldun, en frá því átakið hófst hjá ELKO árið 2020 hefur söfnun í bleikri viku ríflega þrettánfaldast. Á bleikum dögum renna tíu prósent af söluvirði valdra bleikra vara til Bleiku slaufunnar. Auk þess að styrkja Krabbameinsfélagið með söluátaki á bleikum vörum er ELKO stoltur endursöluaðili bleiku slaufunnar og hefur bleika slaufan að jafnaði selst upp í verslunum síðastliðin ár.

Krabbameinsfélagið stendur fyrir öflugu forvarnar- og fræðslustarfi, þýðingarmiklu framlagi til krabbameinsrannsókna, hagsmunagæslu og endurgjaldslausum stuðningi og ráðgjöf til krabbameinsgreindra og aðstandenda þeirra.

„Fjárhagslegur stuðningur einstaklinga og fyrirtækja við átak á borð við Bleiku slaufuna er því ómetanlegt framlag í baráttunni við krabbamein og undirstaða þess að félagið geti áfram sinnt þessum mikilvægu verkefnum,“

segir Árni Reynir Alfredsson, forstöðumaður fjáröflunar- og markaðsmála hjá Krabbameinsfélaginu.

„Krabbameinsfélagið þakkar ELKO af alhug mikilvægan stuðning við félagið í gegnum árin. Verum bleik – fyrir okkur öll.“